Arangkada of Leo Lastimosa for August 9, 2009

                        UHAW SA DUGO

 

            Dul-an sa 800 ang nakahatag og dugo, ang gasa sa kinabuhi, sa usa lang ka adlaw atol sa Kapamilya Blood Donation Campaign nga gipahigayon sa upat ka venues sa Metro Cebu:

·        Ang Cebu City Medical Center (CCMC) nakahipos sa labing daghan (248 ka bags sa dugo) sa EMall;

·        Ang Regional Blood Coordinating Council (RBCC) maoy ikaduhang labing daghan (221 ka bags sa dugo) sa Super Metro Mandaue uban sa Mandaue Chamber of Commerce and Industry (MCCI);

·        Ang Philippine National Red Cross (PNRC) ang nagsunod (169 ka bags sa dugo) sa Gaisano Grand Fiesta Mall Tabunok; ug

·        Ang Regional Blood Council (RBC) may 141 ka bags sa dugo sa SM City.

-o0o-

            Ang CCMC mao gyod ang kanunayng makahipos sa labing daghang dugo.  Tingali tungod sa kadaghan sa katawhan nga mahabwa gikan sa South Bus Terminal ug sa PUJs nga magbiyahean sa habagatang distrito sa Dakbayan sa Sugbo.  Nga angay lang.  Kay ang CCMC mao say nagkinahanglan sa labing daghang dugo tungod sa kadaghan sa iyang mga pasyenteng biktima sa krimen, dengue ug ubang katalagman.

            Ang CCMC, sama sa pribadong mga tambalanan, wa unta maapil sa mga gitugotan sa Department of Health (DOH) nga makahipos ug makatipig og dugo.  Apan giapil gihapon namo sila sa Kapamilya Blood Donation Campaign matag tulo ka buwan tungod sa dakong panginahanglan sa dugo sa ilang mga pasyente.

-o0o-

            Nakugang mi sa gidaghanon sa blood donors nga nagpunsisok sa Super Metro.  Nga niapil sa kampanya sa labing unang higayon.  Salamat sa tabang sa MCCI, nga nagsaulog sa Mandaue Business Month (MBM) tibuok buwan karong buwana, nakumbinser ang mga tagduma sa pagpagamit sa ilang Activity Center.

            Nasipong sa Super Metro ang blood donors gikan sa amihanang Sugbo, labi na sa mga dakbayan sa Mandaue ug Lapulapu ug kasilinganang kalungsoran.  Apan wa sab papiri ang Fiesta Mall, nga maoy gihugopan sa taga habagatang Sugbo, ug SM nga maoy gidugokan sa taga amihanang distrito sa Dakbayan sa Sugbo.

-o0o-

            Labing nakalipay namo ang wa pagtidlom sa gidaghanon sa blood donors bisan sa lagda sa DOH nga di na manghatag og blood donors cards.  Sa ato pa, ang mga mohatag og dugo di nang kapaabot nga librehon kon sila na sab, simbako, ang magkinahanglan og dugo.  Nga mao ang labing mahinungdanong prinsipyo sa paghatag sa gasa sa kinabuhi:  Mohatag kag dugo sa way pagpaabot og ganti gawas sa katagbawan nga ang matag donor makaluwas og hangtod sa tulo ka kinabuhi.

            Ang Sugbo nagkinahanglan og 100 ka bags sa dugo matag adlaw, o 3,000 ka bags matag buwan.  Maong inay kausa ra matag tulo ka buwan, himuon nang Kapamilya Blood Donation Campaign nga binuwan.  Ug palapdan na sa ubang bahin sa Sugbo ug Tungatungang Kabisay-an.  [30]  leo_lastimosa@abs-cbn.com

Arangkada of Leo Lastimosa for August 8, 2009

                        KALIT NABUT-AN

 

            Haskang buotana sa Malakanyang sa niaging mga adlaw.  Salamat sa kamatayon ni kanhi president Cory Aquino.  O sa gidaghanon sa mga tawo nga nagbangotan ug nipasidungog sa napukan nga inahan sa demokrasya sa Pilipinas.

            Subaya ra gud ang dul-an na sa siyam ka tuig nga pamunoan ni Pres. Arroyo.  Maghilak ang adlaw nga way bag-ong eskandalo nga motumaw.  O nga wa silay ikaaway ug pakauwawan.  O nga wa silay mga katungod nga mayatakan.  O nga wa silay mapasundayag nga pagwaldas-waldas sa hinagoan nga buhis sa katawhan.  O nga di sila magpaugat pagbuong sa kaligdong sa mga institusyon aron lang pagpahaom sa ilang hakog nga katuyoan.

-o0o-

            Tan-awa unsa kasulundon sa Malakanyang sa niaging usa ka semana human sa kamatayon ni Cory niadtong Sabado:

·        Nipasidungog dayon ni Cory nga "icon of democracy" ug "national treasure;"

·        Nideklarar dayon og napu ka adlaw nga nasudnong pagbangotan;

·        Nideklarar dayon nga holiday ang adlaw sa paglubong;

·        Nangayo dayon og pasaylo dihang nabisto nga gikuha ang duha ka guwardiya ni Aquino nga naglisod na sa tambalanan;

·        Nidiretso pagduaw sa haya ni Aquino si Arroyo nga mao pay pagtugpa gikan sa giputol niyang biyahe sa Estados Unidos;

·        Gihatagan og full military honors ang paglubong ni Cory bisan sa pagdumili sa iyang mga anak sa gitanyag nga state funeral; ug

·        Gipaundayonan ang mga sugyot paghimong nasudnong bayani ni Cory ug sa pagbutang sa iyang dagway sa P500 nga papel.

-o0o-

            Angayng pasidunggan ang determinadong pagpugong sa Malakanyang sa paghimo sa mosunod:

·        Pagpasulti ni kanhi justice secretary Raul Gonzalez nga nasobrahan rang pagbangotan alang ni Cory ug nga nasobrahan rang kakapayason ni Kris;

·        Pagpabungkag sa naglawudlawod nga katawhan nga nag-atang sa patayng lawas ni Cory nga nakapabara sa trapiko ug paghulga og national emergency kon hapitan nilag saway si Arroyo;

·        Pagsayaw-sayaw sa kalipay ni kanhi senador Tessie Aquino-Oreta; ug

·        Pag-insistir sa mga turutot sa Malakanyang nga purdoy ang nasudnong ekonomiya atol sa pamunoang Cory ug karon na lang nilambo ubos sa pagduma ni Arroyo.

-o0o-

            Namilok sang Malakanyang sa nag-ung-ong unta nga krisis sa konstitusyon sa pagdumili sa Judicial and Bar Council pag-usab sa lista sa unom ka nominees alang sa duha ka bakanteng lingkoranan sa Korte Suprema pinaagi sa pagtudlo sa usa sa nominees nga ila nang gisalikway.  Tukiunon pa hinuon ang legalidad sa pagtudlo nga nilapas na sa 90 ka adlaw nga lugway nga gitakda sa balaod.

      Atong atangan kon samang pagpugong ba sab gihapoy himuon sa nag-aliwaros nilang tinguha pagpamugos sa cha-cha pinaagi sa con-ass.  O kasamtangan lang ang pagbinuotan.  Sa di pa mahibalik ang naandan nga panagway sa pamunoan nga hingpit ang kamangtas.  [30]  leo_lastimosa@abs-cbn.com

Arangkada of Leo Lastimosa for August 7, 2009

              TUNGOD NI CORY

 

       Tungod sa kamatayon ni kanhi presidente Corazon Aquino, magpa-rehistro ko alang sa piniliay sa Mayo 2010.  Kataposan kong nakabotar sa piniliay sa 1987 sa akong presinto sa CSAT (karon Cebu State College of Science and Technology Main Campus) sa M.J. Cuenco Ave.

       Human niadto, tungod ba kaha sa akong kalinga sa akong trabaho isip reporter sa DYLA, o tungod ba sa akong nahibaw-an sa pagsunod sa mga panghitabo sa Sugbo ug sa nasud, wa na ko mobotar.  Bisan dihang gipasidan-an sa Comelec nga ang di kabotar sa duha ka sunudsunod nga piniliay tangtangon gikan sa listahan sa mga botante, wa na ko mosalmot sa way kapuslanan nga kalihokan.

-o0o-

       Kay akong nabantayan nga bisan kinsay nagtungkawo sa gahom, ang kahimtang sa kinabag-an sa katawhan nagpabilin nga mao lang gihapon—nagkalisudlisod, wa kaangkon sa ilang makiangayon nga bahin sa bunga sa ilang paningkamot ug gihikawan sa labing batakan nga mga pangalagad nga gibayran na untang daan sa ilang buhis.

       Wa ko mangandoy og rebolusyon.  Ni kudeta.  Wa ko mokalawat nga ang puwersa ug duguong gubat ray makabugto sa inhustisya nga gilukdo sa katawhan sukad pa sa ilang katiguwangan.  Nawad-an na lang gyod kog pagsalig sa piniliay.  Hangtod di pa gawasnon sa pagpili ang kinabag-an, wa koy nakitang kahigayonan sa tinuorayng kausaban gikan sa balota.

-o0o-

       Nausab ning tanan dihang namatay si Cory.  Dihang nakabatyag kog di masabot nga pagbangotan sa iyang pagpanaw.  Dihang nahibaw-an sa tibuok nasud ug sa tanang katawhan ang iyang kayano ug kamakiangayon sa paggamit sa gahom.  Dihang nabantang ang dagko ug makahuloganong kausaban nga iyang nahimo, nga wa mahatagi sa tinuorayng gibug-aton atol sa iyang pamunoan.

       May luna diay ang kaligdong bisan sa labing taas nga ang-ang sa kagamhanan.  May luna diay ang kabuotan bisan sa mga naghupot sa labing dagkong gahom.  May mga nangatungdanan diay niadto nga tinuoray gyong nagpakabana alang sa labing gagmay ug labing huyang nga hut-ong sa katilingban.

-o0o-

       Busa nganong moboykot pa man ko?  Nganong usikan pa mang balaanong katungod sa pagpili?  Gitambagan ko sa taga Comelec nga ID ray ipakita aron magparehistro.  Bisan sa kalangay ug kalisod pagparehistro sa Comelec sa Mandaue, determinado kong moapil sa piniliay sunod tuig.

       Pipila sa mga tigpaminaw sa Arangkada sa DYAB Abante Bisaya nipahibawo sa ilang hukom sa pagpalista sab human sa wa pagpanginlabot sa nangaging piniliay.  Nga maoy ilang paagi pagtino nga di makawang ang kabilin ni Cory.  Magtutudlo sa USJ-R, Atty. Elaine Bathan, may mas mapuslanong laraw:  Iyang ipakita sa mga tinun-an ang pelikula sa pagdaog ni Cory ug sa demokrasya batok sa diktadura sa 1986 aron pagmatuod nga wa magpasagad ang ilang katiguwangan paghimong mas gawasnon ug mas makiangayon sa kalibotan nga ilang masunod.  [30]  leo_lastimosa@abs-cbn.com

Arangkada of Leo Lastimosa for August 6, 2009

                        ANINO NI CORY

 

            Nilampos ang mga anak ni kanhi presidente Cory Aquino sa pagpatigbabaw sa kaligdong sa haya hangtod sa paglubong sa iyang patayng lawas.  Daghang salamat sa kabilin sa maayong pamatasan nga gibilin sa bantogan nilang inahan.  Nga ang ambisyusong mga politiko—sa oposisyon ug sa administrasyon—way laing kapilian gawas sa pagtahud sa ka-solemne sa kinatibuk-ang kalihokan.

            May pipila nga nisuway paghimo sa lima ka adlaw nga kalihokan nga protesta batok sa pamunoan nga giawhag ni Cory nga pakanaugon.  Apan wa magpada ang kinabag-an sa katawhan.  Nga nagpauwan ug nagpainit sud sa daghang mga takna aron lang makalili sa iyang lungon sa La Salle, sa Manila Cathedral ug sa kadalanan sa Metro Manila.

-o0o-

            Apan dunay wa mobilib sa katakos sa katawhan pagsalikway sa pamolitika aron pagbangotan sa kamatayon sa bantogang haligi sa pagkabanhaw sa demokratikanhong mga institusyon sa nasud.  Si Pres. Arroyo nanagana pagpakita sa iyang dagway sa haya ug wa gyod gani pakita sa paglubong bisan sa pasalig sa pamilyang Aquino nga hatagan siya sa tukmang pagtahud isip pangu sa republika.

            Giputol tuod niyang pagduaw sa Estados Unidos, apan si Arroyo maglisod pagpanalipod sa iyang paglangay pagpauli nga mahimo man untang mobalik og mas sayo pagtambong sa haya sa mas tukmang takna, inay nga mangadlawon pagbutho sa kataposang adlaw sa haya.  Ang iyang pagboykot sa misa requiem sa Manila Cathedral ug pagpahigayon hinuon og buwag nga misa sa Malakanyang di lang dakong insulto batok ni Cory kon dili sa Simbahang Katoliko usab.

-o0o-

            May sukaranan hinuon si Arroyo nga managana.  Kay lab-as pa alang niya ang kauwawan nga nahiagoman dihang nisuway siya pagpahasubo sa kamatayon sa lain niyang politikanhong kaatbang pila ka tuig nang nilabay:  Gikunis-kunis sa mga dumadapig ni Fernando Poe Jr. ang korona sa buwak nga iyang gipada sa haya.

            Mahimong makasalig siya ni Senador Benigno "Noynoy" Aquino III ug sa ubang mga sakop sa Pamilya Aquino.  Apan di siyang kakontrolar sa mamahimong reaksiyon sa katawhan.  Kansang pagpasidungog ni Cory mahimong iyang giisip nga pagsalikway sa iyang pamunoan.

-o0o-

            Mao ni labing dakong kalainan nilang Arroyo ug Aquino—gawas nga wa malambigit si Aquino sa bisan unsang kahiwian atol sa iyang pamunoan.  Si Aquino hugot nga mobarug ug mopatuman sa iyang gituohan nga sakto ug makiangayon bisan unsa pay sangpotanan.  Apan si Arroyo labihan ka-segurista nga kadudahan na hinuon bisan ang labing lunsay niyang katuyoan.

            Alang ni Arroyo di paigo ang iyang pagdeklarar og holiday ug napu ka adlaw nga nasudnong pagbangotan aron paghapuhap sa mga dumadapig ni Cory nga sa buhi pa gipakauwawan pag-ayo sa Malakanyang.  Nabalaka siya nga ang katawhan di kapasaylo niya bisan sa pila lang ka gutlo sa ilang pagbangotan.  Nahadlok si Arroyo sa iyang kaugalingong anino.  [30]  leo_lastimosa@abs-cbn.com

Arangkada of Leo Lastimosa for August 5, 2009

              YANONG CORY

 

       Mas nailhan na karon sa katawhang Pilipinhon si kanhi presidente Corazon Aquino human sa necrological services sa Manila Cathedral ug sa way hunong nga mga testimoniya sa iyang mga guwardiya, mga silingan, mga linudhan sa kasal ug bunyag, mga kauban sa trabaho sa sud ug sa gawas sa kagamhanan, mga kauban sa protesta ug mga katapad sa bus ug ayroplano.

Di lang siya higanteng bantayog sa ligdong nga pamolitika.  Kon dili usa sab ka yano, mahigalaon, mahigugmaon, manggihunahunaon, ug maampuon nga linalang.  Mas napalawoman ang ilang pagtugkad nganong nagpabilin ang iyang kamatinud-anon sa dihang nahuptan ang labing dako ug way kinutobang gahom ug sa dihang nahiagoman sa labing lisod nga mga pagsuway.

-o0o-

       Nakaangkon ko sa kahigayonan pagduol niya dihang kanhi presidente na.  Niduaw siya sa among sibyaanan sa pagpangampanya sa kandidatura ni Noynoy Aquino isip senador.  Lahi sa ubang inilang mga personalidad nga masum-ok sa among announcer's booth, wa siyay daghang samok bisan nagpaabot nga mahuman ang akong komentaryo sa laing kontrobersiya ug ang natanggong nga commercials.

       Wa siyay kuyog nga mga batabata nga magsige og warawara o tudlo sa ilang relo pagpasidaan nga daghan pa silang mas mahinungdanon nga mga lakaw, nga suwerte na kaayo ko nga ilang gihapit kadiyot, ug busa mahimo bang patingugon dayon nako ang ilang amo sa radyo?

-o0o-

       Lahi sa ubang gamhanang mga tawo nga magpa-interview namo, si Cory di mangutanang daan unsay among mga pangutana, o mangayong daan og lista sa among mga pangutana, o mohatag sa iyang kaugalingong listahan sa mga pangutana.

       Ug lahi sa ubang mga higante, si Cory nitubag sa tanan namong mga pangutana.  Kon duna may nanagana, ako.  Ambot tungod ba kaha sa kaikog sa kadako sa iyang katungdanan kaniadto o sa kamapasalamaton nga gihatagan kog kahigayonan sa pagpakighinabi niya, wa kong kapangutana ni Cory mahitungod sa Mendiola Massacre ug sa Hacienda Luisita.

-o0o-

       Ang labing nakapatandog nako mao ang imong pangutana sa una natong panaghinabi dihang ulitawo pa ko:  "Nganong wa pa man ko magminyo?  Kay nabalaka na kong Noynoy"  Sa ikaduhang natong hinabi, dihang minyo na ko, nangutana siya:  "Nganong nagminyo na man gyod ka?  Maayo pa ka, si Noynoy wa pa gyod."

       Giunsa man niya pagkahibawo sa kadugay nakong naminyo?  Ug kon gihunghongan lang sa iyang mga higala dinhi sa Sugbo, nganong naghago pa man siya pagpakisayod?  Wa man unta siyay makuha, nganong nakaangkon pa man og higayon sa pagtandi sa akong kahimtang ug sa bugtong niyang anak nga lalaki?  Tinuod gyod diay tingali siyang nagtugkad sa yuta.  Ug mahinangpon nga nagpakisayod sa sugilanon bisan sa labing kasarangan niya nga mga isigka tawo.  [30]  leo_lastimosa@abs-cbn.com

Arangkada of Leo Lastimosa for August 4, 2009

              KABILIN NI CORY

 

       "Di nang kapauli si Gloria!," mao ni tuaw sa pipila dihang nabantang sa tibuok nasud ang nagdasok nga kaliboan ka katawhan nga mahigugmaong nipauwan og dag nga mga buwak og tinabas nga papel, emosyonal nga nipasundayag sa senyas sa "Laban" (sukol) ug nisiyagit og "Cory!" sa pag-agi sa trak nga gikargahan sa patayng lawas ni kanhi presidente Cory Aquino.

       Apan human nilabay ang lungon, nahilis ang bagang duot sa katawhan sa Makati ug Manila.  Ang nangandoy og dihadihang pag-alsa sa katawhan maghuwat pag dugang.  Mas mahugno sila kon pahinumdoman nga bisang duguong pagbuno ni anhing senador Ninoy Aquino naabtag tulo ka tuig una nisangpot sa People Power revolution.

-o0o-

       Makapauli gihapon si Pres. Arroyo apan mahimong ang katawhan nga mosugat niya sa pagtugpa sa iyang ayroplano karong Miyerkules sa kadlawon di na mao ang katawhan nga iyang gitalikdan sa niaging semana alang sa gipasigarbo-pag-ayo-apan-nakalimtan-na-karon nga panagtagbo nilang US President Barack Obama.

       Ang katawhan nga natandog sa kamatayon ni Cory mahimo nga di na sama kamapailubon sa mga pagpatuyang sa pamunoan ni Arroyo.  Mahimo nga di na sila molingiw sa mosunod nga mga pakauwaw sa mga nagtungkawo sa gahom.  Mahimo nga di na sila magpa-ulug-ulog ni magpaabot sa sunod nga piniliay kon duna na say lain nga masakpan nga manikas ug mangawat ug motampok sa ilang bukubuko.

-o0o-

       Mas kahadlokan alang ni Arroyo mao ang pait nga kamatuoran nga wa siyay mahimo pagpugong sa pagbaha sa katawhan.  Kansang pagbangotan sa kamatayon ni Cory mahimong mosangpot sa kasilag batok sa pamunoang Arroyo.  Di niya sila kagamitan og puwersa nga epektibong nakabaraw sa nangaging mga protesta.

       Tungod sa kamatayon nga nakapadugo sa minilyon ka mga kasingkasing, nakalili sa labing unang higayon ang mga batan-on, ug napahinumdoman ang ilang mga ginikanan, nga may luna bisan sa labing taas nga ang-ang sa kagamhanan ang kaligdong ug kamatinud-anon sa pangalagad, nga maoy kabilin ni Cory apan pangitaunon kaayo sa pamunoan karon.

-o0o-

       Salamat sa kamatayon ni Cory, nakita sa katawhan ang kadako sa gahom sa pagpakabana, ang kalapad sa langyab nga maabot sa ilang pagpanginlabot, ug ang tumang kamasaaron sa ganti sa ilang pagtuo ug pagsalig sa makausa pa sa ilang kaugalingon.

       Matubag na sa di madugay ang pangutana kon unsay himuon sa katawhan kon motambong o isnabon ni Pres. Arroyo ang haya ug ang lubong ni Cory.  Ang mas mahinungdanong pangutana nga nagkinahanglan og mas dinaliang tubag:  Unsay himuon sa katawhan kon si Arroyo padayong motago inay motubag sa mga pasangil sa kahiwian batok sa iyang pamunoan; ug inay mangayo og pasaylo sa daghan niyang kasaypanan mohingpit hinuon sa pagbugalbugal pinaagi sa pagsuway pagwatas-watas sa batakang balaod ug paglugway sa iyang pagpahimus sa gahom?  [30]  leo_lastimosa@abs-cbn.com

Arangkada of Leo Lastimosa for August 3, 2009

                CORY HOLIDAY

 

            Ang pamilya ni kanhi presidente Corazon Aquino nakugang sa kamahigalaon ug kamanggihatagon sa mga lakang ni Pres. Arroyo pagpasidungog sa iya na karong gihulagway nga "national treasure" ug "icon of democracy:"

·        Pila ka gutlo human ipahibawo ni Senador Benigno "Noynoy" Aquino III ang kamatayon sa iyang inahan, nideklarar dayong Malakanyang og usa ka semanang nasudnong pagbangotan;

·        Human sa pila ka gutlo, gipatas-ang Arroyo ang nasudnong pagbangotan ngadto sa napu ka adlaw; ug

·        Dihang nipahibawong pamilyang Aquino nga way taga Malakanyang nga nakiglambigit nila, giputol ni Arroyo ang iyang biyahe sa US ug gideklarar ang Agosto 5, ang adlaw sa paglubong, nga special non working holiday.

-o0o-

            Abunda ang mga timaan nga nagkinto pag-ayong Malakanyang sa kamatayon ni kanhi presidente Aquino:

·        24 oras nga gisunod sa Malakanyang ang kahimtang sa panglawas ni Aquino dihang niangkon ang pamilya nga lisod nang iyang kahimtang;

·        Gipaandam nang daan ang militar ug kapolisan ug ubang mga buhatan sa kagamhanan sa pag-andam daan og mga pasidungog kon mamatay na si Aquino;

·        Matag adlaw nga gipahibawo sa Malakanyang ang pagpasidungog sa mga nahimo ni Aquino ug ang pagpangaliya ni Arroyo alang sa iyang kaayuhan; ug

·        Si Arroyo nisugod sa iyang Sona sa pagdapit sa tibuok nasud pag-uban niya pagpangaliya alang ni Aquino (bisan tuod gilabhan niya si Aquino uban sa laing duha ka kanhi presidente, silang Fidel Ramos ug Joseph Estrada sa pagbuylo na iyang pakigpung.)

-o0o-

            Pagmatuod lang ni unsa ka-abante ang panghunahuna ni Arroyo.  Bisan wa pa tingali kahunahuna ang iyang mga kaatbang, gipangandaman na niyang daan ang posibleng paggamit sa kamatayon ni Aquino pagpalagpot niya sa gahom.  Ang katam-is na sa ilang sinultihan gitumong aron mahapinan kon di man hingpit makalimtan ang ilang pagpanamastamas ni Aquino dihang niawhag sa iyang resignasyon tungod sa Hello Garci ug sa NBN-ZTE scandal.

            Gikuyawan si Arroyo nga moulbong kasuko sa katawhan kon mahinumdoman ang pakauwaw sa mga irong buang sa Malakanyang:

·        "I think there is no need to monitor Cory Aquino because she's also busy monitoring her own daughter."

·        "I do not know how big is the following of Cory Aquino, if she cannot get the following of Hacienda Luisita."

-o0o-

            Giputol tuod ni Arroyo ang iyang biyahe sa US.  Apan mohapit una siya sa New Jersey ug San Francisco sa di pa mopauli.  Motugpa ang iyang ayroplano sa NAIA sa Miyerkules sa kadlawon.  Abunda pang iyang panahon pagduaw sa haya ni Aquino sa La Salle Greenhills kay alas-9 pa man sa buntag ang misa requiem.

            Bisan supak sa buot, way laing mahimo silang Noynoy ug ubang sakop sa pamilyang Aquino gawas sa pag-abi-abi ni Arroyo.  Ug pagpasalamat sa iyang pagpasidungog sa kanhi presidente.  [30]  leo_lastimosa@abs-cbn.com