Arangkada for July 7, 2007

       LIKOY ANG DOH

 

       Daghang nihangop sa kaisog sa kadagkoan sa Department of Health (DOH) pagbadlong sa lokal nga mga opisyal nga nagpatuyang sa ilang gibati pagpasiugda og fogging operations batok sa dengue.  Matod sa DOH labawng makadaot ang fogging.  Kon maluwas ang mga bata gikan sa mga lamok nga nagda sa kagaw sa makamatay nga dengue, kuyaw silang makasingo sa makahilo nga kemikal nga way pupanagang gibugwak sa fogging machines.

        Ang pag-insistir sa DOH nga ang pagpanlimpiyo sa palibot, di fogging, maoy labing epektibong panagang sa mga molupyo gikan sa makahahadlok nga pagkatap sa dengue nakaangkon og dugang gibug-aton tungod sa nitumaw nga pagduda nga ang lokal nga mga opisyal nipahimus sa epidemiya sa dengue aron pagpalusot ug pagpaburot og tambok nga mga komisyon gikan sa fogging chemicals.  Apan sa niagi ra ning tuig.  Nilikoy ang DOH karong tuiga.

-o0o-

        Aron pagbaraw sa dengue outbreak sa Minglanilla ug kasilinganang mga lungsod sa habagatang Sugbo, ang DOH maoy nag-una-una pagpasiugda og fogging operations.  Nakugang ang mga molupyo nga nakakita nga morang nagpiyesta ang mga opisyal sa DOH pagpabulhot ug paghabol sa tibuok kabalayan sa puti nga aso sa fogging machines, aron ba kaha pagtino nga way bisan unsang makaikyas gikan sa makahilong kemikal.

        Nganong nikalit man lag kalami ang DOH?  Nganong sila na may nahimong mga ahente sa makahilong mga kemikal?  Wa na ba silang kasukol sa mas gipaburot nga komisyon gikan sa pagpangompra sa daghang kemikal?  Nganong gi-um-om na man ron ang ilang kaugalingong mga pasidaan nga ang kemikal mas makadaot kay sa dengue?

        Ug karong nangompra nang DOH sa mga kemikal, kinsa na man lay mobadlong sa lokal nga mga opisyal pagtultol sa ilang karaang mga suki nga determinadong mobuhi sa labing makahilo nilang mga kemikal bugti sa pagpaburot sa pribadong mga bolsa sa hakog nga mga politiko?

-o0o-

        Ang labing dakong kadaot nga mahimo sa pinatuyangan nga paggamit sa mga kemikal mao ang paglipat ug paghukas sa mga molupyo sa labing kasaligang alkontra batok sa dengue—ang pagpanlimpiyo sa palibot:

·         Magsige na lang unya og awhag sa lokal nga mga opisyal pagsalida sa way kapuslanan nga fogging operations;

·         Ang mga lamok nga nagda sa dengue maoy maghudyaka kay di man sila mahitabong maapsan sa mga kemikal;

·         Molapad na hinuong mga dapit nga maigo sa dengue kay igo ra mang mamalhin ang mga lamok sa silingang mga barangay gikan sa mga luna nga gihimoan og fogging;

·         Inay manlimpiyo sa ilang palibot, mangyabo sa tanang nagpundo nga tubig sa ilang kabalayan, ang mga molupyo mangiyugpos na lang nga magpaabot sa sunod nga fogging; ug

·         Ang mas daghang mangamatay sa dengue tubagon sa mas daghan ug mas makahilong mga kemikal.  [30]  leo_lastimosa@abs-cbn.com

Arangkada for July 6, 2007

          GIUNAY ILANG AMO

 

          Inay paminawon ang sibaw nang awhag sa Sugbuanong mga magbubuhis alang sa matinud-anong subay sa gasto sa Cebu International Convention Center (CICC), si Gobernador Gwen Garcia padayong nagpapating.   Human nanghambog nga labihang baratoha sa "world class" nga CICC, si Garcia niangkon nga mahimong mas dako pang aktuwal nga gasto kay sa una niyang gitug-an ug nga kinahanglan na diayng ayuhon ang CICC tungod sa nabistong mga depekto, tunga pa lang sa tuig human natukod.

          Ang giluwatan ni Garcia pulos ra numero ug pagarpar, way mga dokumento.   Tungod sa lapad nga pagduda nga tagoan gyod ang gikahadlokang nangalisbong mga transaksiyon, ang mga turutot ni Garcia napugos sa pagpalili sa pinili nga mga dokumento.

-o0o-

          Si Garcia nakadawat sa pormal nga awhag pagpakita sa mga dokumento sa CICC niadto pang Pebrero karong tuiga.   Ubos sa balaod, duna lang siyay 15 ka adlaw pagtuman sa makiangayong awhag sa mga magbubuhis, kay sila man ang tinuod nga tag-iya sa kuwarta nga iyang gigasto.   Hangtod karon, upat na ka buwan ang nilabay, napakyas si Garcia pagpakita sa mga dokumento.

          Kon kasarangan pa lang nga opisyal si Garcia, nasilotan na unta siya.   Apan ambot unsay hinungdan—tungod ba kaha sa kadako sa iyang gahom, o sa gituohang kasikit niya ni Pres. Arroyo, o nahudlat ba lang ang Visayas Ombudsman sa nagsunudsunod niyang pagkiha ug pag-awhag nga suspensuhon ug pulihan og laing imbestigador si Acting Deputy Ombudsman Virginia Palanca-Santiago—wa pa gyoy nakatandog niya, bisan pagpahinumdom na lang sa batakan niyang katungdanan isip alagad, suluguon ug sinuholan sa tinuod niyang agawon, ang mga lungsoranon.

-o0o-

          Magpasalamat hinuon ta nga di gyod mosugot ang langit nga magpabiling misteryo hangtod sa hangtod ang gidudahang mga transaksiyon sa CICC.   Labing sinaligang mga opisyal ni Garcia, Bise Gobernador Gregorio Sanchez, Provincial Treasurer Roy Salubre ug Architect Manuel Guanzon, maoy nibisto sa gihimo sa ilang amo—ang pagkumbinser sa mga kontraktor nga nakadaog sa subasta pagpaubos pa sa ilang presyo—nga gitumbok nga dakong kalapasan sa Government Procurement Act ( R.A. 9184).

Segun sa Government Procurement Policy Board (GPBB) ang pagduol sa kontraktor aron paubsan ang iyang presyo makabuong sa kaligdong sa subasta.   Kon ang kontraktor managanang daan nga kumbinsihon siya sa pagsawom bisan human nang subasta, mahimong di siya motanyag sa labing ubos ug makiangayong presyo atol sa subasta.

-o0o-

          Ipanghimakak bang Garcia ang pangangkon nilang Sanchez, Guanzon ug Salubre?   Pahilumon ba sila, pagunahon sa Sudlon, o ilabay sa Camotes?  O angkunon niyang pasangil nga nagpatuyang siya nga morang iyang personal nga kuwarta ang gigasto?

          Magkadugay ang pagdikidiki ni Garcia paghatag sa kuwentada sa CICC, magkadako sang pagduda sa iyang kamatinud-anon.   Ug ang kamatuoran di mahimong pig-otan, di sa iyang kamaginukdanon ni sa naghingapin niyang ambisyon.  [30]  leo_lastimosa@abs-cbn.com

Arangkada for July 5, 2007

          PATIGAYON SA DUGO

 

          Sa makausa pa, ipahigayon na sang Kapamilya Bloodletting sa labing dagkong shopping malls sa Sugbo karong buwana.  Ang kalihokan matag tulo ka buwan nga gipasiugdahan sa DYAB Abante Bisaya kanunayng makatigom og gatosan ka bags sa dugo ug nakatampo og dako sa pagluwas sa mga kinabuhi sa mga pasyente ug mga biktima sa mga aksidente ug katalagman di lang sa Sugbo kon dili apil na sa kaulohan ug ubang bahin sa nasud.   Ang sunod nga hugna sa paghatag sa gasa sa kinabuhi among gipaningkamotan nga mahimong mas dako pa.

          Nasubo lang hinuon mi nga ang usa sa labing sinaligan namong kaabag ning dako ug mapuslanong kalihokan sa nangaging daghan nang katuigan wa na lugwayi sa ilang lisensiya ug gikatakdang himuon na lang nga kasarangang tighipos og dugo.

-o0o-

          Ang Regional Blood Coordinating Council (RBCC) maoy katimbang ug mao gani naggiya sa labing una namong Kapamilya Bloodletting sud sa TV Newsroom sa ABS-CBN Regional Broadcast Complex sa Jagobiao, Mandaue City.   Tungod sa kagamay sa luna ug sa kakuwang namo og kasayuran unsaon pagduma ang kalihokan, 38 ra ka bags sa dugo ang nahipos niadtong higayona.  Mas daghan nang among nahipos sa nisunod nga bloodletting sa Caputhaw, Cebu City ug Fatima Parish sa Basak, Mandaue City.  Uban gihapon sa RBCC.

          Nakatigom na mi og kapin sa 600 ka bags sa dugo sud lang sa usa ka adlaw dihang nakigtambayayong na mi sa higanteng shopping malls ug sa ubang mga ahensiya, sama sa Philippine National Red Cross (PNRC), Regional Blood Center (RBC), Cebu City Medical Center (CCMC) ug Cebu Doctors Hospital.   Apan kauban lang gihapon namo ang RBC.

-o0o-

          Maong labihan nakong kuganga pagkahibawo nga wa na lab-asa sa Department of Health (DOH) ang lisensiya sa RBCC isip blood bank nga napupos niadtong Hunyo 30.   Ug nga kon mapirmahan ang bag-ong kauyonan, ang RBCC igo na lang motunol sa ilang makolektang dugo ngadto sa RBC.  Mao ba ni bugti sa kagamhanan ngadto sa dakong tampo sa RBCC pagpalambo sa suplay sa Sugbo?

          Kon unsa kahigpit ang DOH sa RBCC, nganong labihan man nilang lubaya sa kuwestiyonableng pag-operate sa blood banks sa pribadong mga tambalanan nga nipahamtang og mas dagkong bayranan ngadto sa mga pasyente?

-o0o-

          Si Dr. Susana Madarieta, director sa DOH 7, nipasabot sa DYAB Abante Bisaya nga unya na istriktuhon ang pribadong mga tambalanan kon makahupot na silag mas modernong kahimanan pag-centralize sa blood distribution ubos sa RBC.

          Pagkakaron, magpatara ba lang nga padayong (1) pasanginlan sa mga tambalanan ang screening sa dugo sa RBC, sama sa PNRC ug RBCC, nga di kasaligan ug busa pabayron ang mga pasyente sa laing screening ug (2) mamunlot sa nangluspad na nilang donors aron pagbuhi sa ilang patigayon sa dugo?   [30]  leo_lastimosa@abs-cbn.com

--
LEO LASTIMOSA
DYAB Manager
leo_lastimosa@abs-cbn.com
4221958

Arangkada for July 4, 2007

       KARAANG LALIS

 

       Wa pa gyod mahuman ang lalis sa kontrobersiya sa pagpahamtang og dress code sa mga manimbahay nga gipaluyohan sa mga obispo sa Simbahang Katoliko.   Atol sa Kulokabildo.Com sa DYAB Abante Bisaya sa Ayala Entertainment Center, nagkatinubagay silang Msgr. Achiles Dakay, ang media liaison officer sa Artsidyosesis sa Sugbo, kinsa nitugyan sa panginahanglan pagsul-ob og tukma nga sinina alang sa simbahan ngadto sa tanlag sa mga parokyano, ug ang mga nanambong nga niinsistir nga di sila angayng but-an unsay isul-ob kay mas mahinungdanon nga limpiyo ang ilang kasingkasing nga niatubang sa Labawng Makagagahom.

       Sa iyang bahin, si Atty. Marcelo Bacalso sa Catholic Faith Defenders, nitataw nga di katuohan silang Dakay ug ubang kaparian kay utro sab silang nakalapas sa mga lagda nga gibalikbalik na pagpahamtang sa Vatican sa tukmang bulok sa ilang isul-ob atol sa misa ug sa ilang isul-ob gawas sa simbahan.

-o0o-

       Ang lalis sa dress code sa simbahan unang niulbo dinhi sa Pilipinas gatosan na ka tuig ang nilabay.   Niadtong 1770, usa ka obispong Dominican niluwat og taas nga listahan sa iyang giingong kasal-anan sa mga Pilipino.  Giapil niya ang "di tukma" nga sininaan sa kababayen-an atol sa misa.   Usa sa iyang gibuyag mao ang pagsul-ob sa kababayen-an og mga sinina nga ubos og liab nga nakapabantang sa kabahin sa ilang dughan.

       Nasuwat ni sa librong "The Roots of the Filipino Nation" ni O.D. Corpuz, nga gipahuwaman ni Col. Sol Dalid nako.   Tinuod gyod diay nga magbalikbalik rang kasaysayan.  Kay ang gidili sa obispong Dominican 237 ka tuig nang nilabay, mao say usa sa gibadlong sa mga lagda sa Artsidyosesis sa Manila (plunging neckline) duha ka semana ang nilabay.   Ang daotang balita alang sa kadagkoan sa simbahan sa atong panahon, ang pangasaba sa Obispo niadtong 1770 wa kausab sa sininaan sa mga Pinay sa sud sa simbahan.

-o0o-

       Dakong opisyal sa kagamhanan nga mamugos gyong patokaron ang iyang kinaham nga awit matag abot niya sa mga programa nga iyang tambongan (demalas lang kon dunay magdiskurso inig abot niya kay seguro gyong maputol), nipahamtang pa gyod og laing duha ka lagda:

·         Una, di na siya patawag sa iyang ngan, kinahanglang tawgon na sa iyang posisyon; ug

·         Ikaduha, kinahanglang mangayo og katahuran ang mga kawani niya nga ikasugat niya.

-o0o-

       Nasugamak sa unang lagda mao ang iyang karaang mga higala nga wa kahibawo sa iyang kalit nga kausaban.   Kay dugay nang wa magkita, mainiton nilang gitawag ang iyang ngan sa ilang paghangpanay.  Kuwang na lang silag dyutay nga gitud ug gipahinumdoman sa iyang posisyon.

       Kawani sa iyang kaubang opisyal ang nasugamak karong bag-o sa ikaduhang lagda.   Tungod sa kapakyas pag-ingon og "good morning," gipatawag ang kawani sa iyang buhatan, gipakuyog ang opisyal, ug gisabonan og kasaba.  [30]   leo_lastimosa@abs-cbn.com

Arangkada for July 3, 2007

       DAMGO SA PATIGAYON

 

       Unsa ba gyod kalisod ang pagnegosyo?  Unsaon pagpili sa patigayon nga labing tukma sa imong katakos?  Unsay mga pangandam nga gikinahanglan aron nga di langawon lang ang napilian nga patigayon?   Unsaon paghingan, pagputos ug pagbaligya ang produkto aron nga makadani sa mga konsumidor ug makabarug sa mas nag-una nga susamang mga produkto?  May garantiya ba nga ang pagsud og patigayon makapalambo ug di makapaunlod na hinuon sa mga damgo sa tingusbawan sa imong pamilya?

Unsa bay katakos nga gikinahanglan aron pagtino nga ang halin di mahurot og panukli?   Makaayo ba ang pagpangutang aron makasugod o makapalapad sa patigayon?  Pila ba ka buwan o tuig ang naandan nga pag-utong ug pag-um-om sa tanang gasto una mosugod pagkita ang patigayon?

-o0o-

Kini ug uban pang mga pangutana ang among gilaoman nga matubag sa mosunod nga mga adlaw.   Karong pormal nang gilusad ang ikaduhang season sa Kapamilya Negosyo Na! (KNN), ang tulomanon sa DYAB Abante Bisaya nga modasig, mogiya ug motabang sa labing kabos nga mga Sugbuanon sa pagbarug sa ilang kaugalingong mga tiil pinaagi sa patigayon.

Ang hinugpong proyekto sa DYAB ug University of San Carlos College of Commerce Alumni Association (USC-COCAI) mobalik sa kahanginan karong Sabado.   Sa niaging duha ka semana, napahigayon nang livelihood skills training ug workshop paghimo og business plan.  Ang makasumiter sa labing masaarong business plans, sama sa unang season, makadawat og libreng puhonan, apan ning higayona mas dagko na.   Agakon sila pagpatuman sa ilang patigayon pinaagi sa mga giya sa resource persons sa USC ug DYAB ug tabangan sa ilang mga panginahanglan sa mga tinun-an ug malampusong mga magpapatigayon nga makigsawo sa adunahan nilang kasinatian.

-o0o-

       Nikumpisal na ko sa mga tigpasiugda sa KNN nga wa pa gyod mabuntog ang nagbuntaog nakong kahadlok sa alkanse nga maoy nakagapos sa dugay nang damgo sa pagnegosyo.   Maong tuguting pakisaw-an na lang nako nimo ang duha ka talagsaong tambag nga akong nadawat mahitungod sa patigayon nga, nakatag-an mo, wa gyod nako pangahasi pagpatuman:

·         TexTsilog (gikang JT Benz):  Mamaligyag rice, tapa, itlog ug softdrink (P30 ra aron nga makaribal sa mas dagkong fast food chain), ihatod sa pakyawon nga habal-habal, ngadto sa mga suki nga mo-order pinaagi sa text (kaldero, kaha ug stove ray puhonan, ug aron di moburot og kinaon sa sobra, mahimong unya na magluto kon duna nay orders); ug

·         Formula paghimo og plano sa negosyo nga garantisadong molampos (gikang kanhi agriculture secretary Cito Lorenzo, dihang nahimo nako siyang dinapit sa Arangkada):   Susiha ang usa ka labing himalitan nga produkto, subaya ang kinatibuk-ang proseso nga giagian ini sa wa pa moabot sa mga estante sa mga tindahan, ug pangitaa ang bahin sa proseso nga imong kasudlan ug kapanginabuhian.   [30]  leo_lastimosa@abs-cbn.com

Arangkada for July 2, 2007

       KABILIN NI GLO

 

       Si Pres. Arroyo nihulagway sa kataposang tulo ka tuig sa iyang termino nga "legacy phase."  Mao ni nahimong sukaranan sa mga panghinaot nga mausab nang dagan sa iyang pamunoan.  Nga ang nahibiling mga adlaw ni Arroyo sa Malakanyang hangtod sa iyang pagkanaog sa 2010, igahin sa pagmugna og dagkong mga kabilin nga makapapas sa nangaging mga eskandalo ug makapatuyhakaw og mas maayong bantayog pagsimbolo sa iyang siyam ka tuig nga pagduma sa nasud.

        Ang iyang state of the nation address (SONA) karong buwana gipaabot nga molatid sa mga programa pagpalambo sa ekonomiya, pagmugna og dugang kahigayonan sa panarbaho, paghaw-as sa kinabag-an sa katawhan gikan sa kakabos, pagpalambo sa sistema sa edukasyon, modernisasyon sa kapolisan ug armadong kusog ug pag-iban sa pangurakot sa burukrasya.

-o0o-

        Sa di pa mangambisyon paghimo og higanteng kabilin, si Arroyo angayng molingkawas una gikan sa mga higot nga gigapos sa iyang kaugalingon tungod sa desperado niyang maniobra pagpabilin sa gahom bisan sa sibaw apan nagkatibuwaag nga awhag sa politikanhong oposisyon ug nagkalainlaing hut-ong sa pagpalagpot niya sa katungdanan.  Kay di siyang kapasiugda og bisan unsang makahuloganong kausaban kon padayong magkinto sa tanan niyang nautangan sa paglugway sa iyang politikanhong kinabuhi.

        Ang nalangay ug puno sa pag-ukun-ukon nga lahugay sa gabinete di maayong timaan sa iyang determinasyon paglingkawas gikan sa lang-og niyang kagahapon.  Ang pagbalik ni Hermogenes Ebdane sa DPWH human tangtanga sa DND gikahadlokan nga mao lay pasiuna sa naandang pagtuyuktuyok lang gihapon sa iyang mga sinaligan, apil na ang mga gilambigit sa labing nangalisbong mga anomaliya.

-o0o-

        Bisan unsa pa kamakiangayon, ang mga programa nga ipatuman ni Arroyo maglisod sa pagtunhay.  Kay lisod nga magkatakdo ang interes sa labing kabos sa katawhan, nga iyang gisaaran og pagkaon sa matag lamesa, ug sa gamhanang mga politiko ug dagkong mga negosyante, nga di mahitabong molugak sa pagpaningil og bayad sa ilang pagsapupo sa diriyot na mahugno niyang pamunoan.

        Ang labing mahinungdanong kabilin ni Arroyo mao ang iyang talagsaong pagpug-ok sa kabubut-on sa kinabag-an sa katawhan sa pagpalayas na unta niya gikan sa palasyo.  Ang kamalampuson niya pagbuakbuak sa mga politiko, nga hastang iyang higpit nga mga kaatbang niangkon na nga ang pag-impeach niya karon magkahulogan lang nga mas lig-on si Noli de Castro ilang ikabangga pagka presidente sa 2010.

-o0o-

        Mahimong mapupos na lang ang termino ni Arroyo apan di lang gihapon matubag ang mga pangutana sa kaligdong sa iyang pagsakmit og lab-as nga mandato niadtong 2004.  Apan ang gitipigan niyang sekreto di mahitabong matago niya hangtod sa hangtod.

        Ang pagkabisto sa kamatuoran giunsa niya pagpilde silang FPJ ug uban niyang mga kaatbang maoy garantiya nga ang kabilin ni Arroyo mao ang magbuntaog nga bantayog sa mga paugat ug pagpahimus sa gahom.  [30]  leo_lastimosa@abs-cbn.com

Arangkada for July 1, 2007

       HALAD SA KAPAMILYA

 

Ang dakong piyesta sa mga serbisyo, ang way kinutobang pangalagad, ang tinuig nga Halad sa Kapamilya sa DYAB Abante Bisaya ug ABS-CBN Cebu, nahinayon ug, sa makausa pa, nakahikap og daghang kinabuhi.  Di lang ang kaliboan nga natabangan, nga kasamtangang nakalingkawas gikan sa labing batakan ug labing dinalian nilang kahimtang, kon dili hasta na sa gatosan ka mga indibiduwal ug kahugpongan nga wa managana pagtanyag sa ilang katakos sa pagtabang.
       Salamat sa tanang nakatampo sa Halad sa Kapamilya nga tibuok adlaw nga gipahigayon sa Mabolo Elem. School grounds, nga maoy usa sa labing hapsay ug malampuson sukad sa pagsugod ning higanteng kalihokan nga nahimo nang hingpit nga bantayog sa pagtinabangay sa mga Sugbuanon.
               -o0o-

Dakong opisyal sa kapolisan nga nakalili sa Halad sa Kapamilya nibanabana nga niabot og 6,000 ka mga tawo ang nagpunsisok sa nagkalainlaing mga sentro sa serbisyo nga giladlad sa dakong wanang sa Mabolo Elem. School.  Apil sa mga pangalagad nga gikuninitan pag-ayo:

·         Ang Medical Mission nga giduma sa 100 ka mga doktor ug nurses nakahatag og libreng konsultasyon ug mga tambal ngadto sa 2,000 ka pasyente;

·         Ang local ug overseas job fair nga nagtanyag og kaliboan ka trabaho sa Sugbo ug sa ubang kanasuran gidagsa sa kaliboan ka mga aplikante, niabot og 90 ang hired on-the-spot (HOTS);

·         Ang Dental Mission uban sa mga dentista ug dental van sa Cebu City Health Department nakaibot ug nakapasta sa mga ngipon sa 150 ka pasyente;

·         Ang Cebu City Veterinarian's Office ug Southwestern University nakabakuna, nakakapon ug nakahatag og shampoo ug bitamina ngadto sa 300 ka mga iro ug iring; ug

·         Mas daghan pa ang nakapahimus sa serbisyong legal sa mga abogado ug abogada sa YLAC, IBP Cebu Chapter ug UV Gullas Law School, mass feeding sa Bantay Bata 163 Cebu, masahe sa Bright Path Blind Association, reflex sa San Nicolas de Tolentino Reflexologists ug one-stop shop sa mga serbisyo sa NSO, NBI, LTO, OWWA, SSS, NLRC, Pagibig, Philhealth ug Cebu City Treasurer's Office.

-o0o-

Wa sab papiri ang pribadong mga kompaniya nga maoy nanghatag sa mga tambal, ECG ug blood sugar screening ug chest x-ray alang sa mga pasyente, pagkaon ug tubig alang sa mga boluntaryo, ug mga tolda, lamesa ug lingkoranan.  Ang kinabag-an sa mga doktor gikan sa Cebu City Medical Center ug ang nurses gikan sa UV College of Nursing.  Gipanalipdan sang mga nangapil gikan sa mga mapahimuslanon sa mga polis ug mga tanod sa Mabolo.

Labihang bunok sa uwan sa bisperas ug pagkahuman apan atol sa kalihokan labihang nindota sa kahimtang sa panahon, inabagan sa bugnawng huyuhoy ug dagkong mga punoan sa kahoy.  May nagtan-aw gyod sa ibabaw sa talagsaong pagtinabangay sa iyang mga linalang.  Hangtod sa sunod Halad!  [30]  leo_lastimosa@abs-cbn.com